Nagbabala ang Philippine Postal Corporation (PHLPost) sa publiko hinggil sa kumakalat na pekeng impormasyon sa text o online messages na ipinadadala ng mga scammers gamit ang pangalan ng PHLPost at logo nito gayundin sa ibang delivery services.
Ayon sa PHLPost, may natatanggap silang mga mensahe o notices via text/email at online na nagsasabing meron silang sulat o pakete na hindi pa nai-dedeliver dahil sa maling address at kinakailangan na i-update ang naturang address at magbayad ng kaukulang halaga ng P17.05. Ang mensahe ay naglalaman ng pekeng website ng PHLPost na hindi pag-aari ng ahensya.
Sa kagustuhan ng makapangloko ang ganitong uri ng grupo o indibidual, sa pamamagitan ng mensahe, magbibigay sila ng impormasyon na may lamang pananakot upang mataranta ang biktima at agad na i-click ang link o yung tinatawag na “clickbait” scam.
Nais ipaalam ng PHLPost na kailanman ay hindi sila magbibigay ng mga mensahe ng pananakot sa kanilang mga kliyente at pinayuhan nito ang publiko na maging mapagbantay sa ganitong mga uri ng scam.
Inabisuhan ng PHLPost ang publiko na kung meron silang inaantay na sulat o parsela, ay mangyari na i-verify ito sa kanilang customer service hotline number (02) 8288-7678 o mag-email sa phlpostcares@phlpost.gov.ph at bisitahin din ang kanilang website na www.phlpost.gov.ph para sa iba pang impormasyon mula sa tanggapan.
